Купала… Колас… Яны дараваны нам Богам, каб пра беларускі народ ведалі ва ўсім свеце. “Іх імёны вымаўляюцца заўсёды разам. Іх псеўданімы з народнага жыцця і фальклору. Калі Колас—зямля, дык Купала— неба над роднаю зямлёю, калі Колас-хлеб, дык Купала—песня. Колас—цяпло роднага дому, трываласць і спакой, Купала—лірычны неспакой, трывога за родны край і яго людзей. Купала і Колас—блізкія, але і розныя”. Яны ў літаратуры застаюцца разам-удвух,дапаўняючы адзін аднаго. Купала—паэт-рамантык, Колас—рэаліст. Купала рвецца ў свет ад зямлі, ад забітасці і цемры людской, Колас вяртаецца на зямлю, у свой родны, мілы кут. Янка Купала і Якуб Колас ўславілі сваю Бацькаўшчыну, сталі народнымі прарокамі, сцвердзілі сілу і моц беларускага слова. За ўсё гэта нашым слаўным песнярам самая глыбокая ўдзячнасць і пашана.
Вучні 10 і 11 класаў сталі ўдзельнікамі інтэрактыўных віктарын “Мне сняцца сны аб Беларусі” ( жыццё і творчасць Янкі Купалы) і “Сэрца пакідаю вам” ( жыццё і творчасць Якуба Коласа) . Рабяты не толькі аднавілі свае веды аб жыцці і творчасці класікаў Беларусі , але і даведаліся пра цікавыя факты з жыцця песняроў.
Падарожжа “Сцежкамі Янкі Купалы і Якуба Коласа”
Прачытанне Купалы і Коласа дае магчымасць у многім па-іншаму зірнуць на жыццё, на гісторыю беларусаў, лепш і глыбей зразумець іх душу, характар, светапогляд, адчуць і ўбачыць найвялікшы цуд, створаны геніямі народа— яго мову. Іх творчасць-повязь пакаленняў, духоўная сувязь паміж продкамі і нашчадкамі.
Вучні 10 класа Выдрова Ульяна і Цямрук Мацвей падрыхтавалі для дзяцей малодшых класаў захапляльнае падарожжа ў мінулае— у часы Янкі Купалы і Якуба Коласа.Тады, калі не было яшчэ ні камп’ютараў, ні тэлевізараў… Яны пазнаёмілі рабят з цікавай інфармацыяй пра сям’ю, дзяцінства і юнацтва паэтаў, іх захапленні. Расказалі аб гарадах і вёсках, дзе паэты жылі, вучыліся і працавалі. Напрыканцы падарожжа дзеці прачыталі любімыя вершы Янкі Купалы і Якуба Коласа.
Мы—галіны, а Купала і Колас—карані аднаго вялікага дрэва. Гэта яны трымаюць нас і пояць сокамі з глыбінь зямлі. Таму чытайце Купалу і Коласа, чэрпайце іх мудрасць, вучыцеся ў іх любіць усё, што нас акружае, і ў першую чаргу сваю родную зямлю.
Тыдзень беларускай мовы і літаратуры яшчэ раз паказаў, што мова Коласа і Купалы гучыць і сёння. Яна застаўляе нас перажываць, радавацца, любіць, прымушае мацней біцца нашы сэрцы, ганарыцца нашай гісторыяй і культурай, тым, што мы — беларусы.
